El Toralín ye una asociación berciana en defensa de la llingua propia d'esta tierra.

El Llïonés, vive guei n'El Bierzu una situación de minorización. La llingua castellana cumu idioma de prestixu, y el gallegu normativu na fasteira más ocidental, arrequeixan al Llïonés.

La nuesa llingua nun puede estudiase nos Centros Escolares, nun goza de proteición pur parte las alministraciones públicas, nun cuenta cun una autonomía fuerte que regale llibros a las bibliotecas, peru ye la nuesa llingua y nun vamos deixala morrere.

Tamos arguyosos de tener un idioma propiu. Tamos arguyosos de sintir a los nuesos mayores emplegalu día a día en Furniella, nel Altu Sil, nel Valle'l Bueza, nos Ancares, n'El Bierzu Central, y en Cabreira.

Préstanos sintir untavía la nuesa llingua n'El Bierzu Oeste, qu'anque amecida cul gallegu y castellán, entá vive en pallabras, espresiones y xiros.

Préstanos vere que nin siquier na comarca harmana de Valdïorras el gallegu pudu esborriare dafeichu las pallabras que pronuncian xentes que van dous sieglos yeran bercianos.

El Toralín naz por eillu. Naz cumu homenax a tolos bercianos "que hablaban mal", "que no saben hablar", "que hablan raro" ou "que hablan medio gallego".

Naz en defensa d'un idioma que nun ye meyor nin pior qu'outros, y que, simplemente, ye'l nuesu.

Naz cumu campana que tocará a conceyu nos nuesos pueblos pa que los políticos de las istituciones sepan que llevamos bien de tiempu callaos, y que queremos falare.

Queremos falare cumu falanun los nuesos guelos, cumu falanun los nuesos pais, y cumu queremos que falen los nuesos fiyos: EN LLÏONÉS.

Éstu ye'l Toralín: un chanu na montaña. Un altu nel camín. Un ¡Basta yá de callare!

Que vos preste.